Yadigar Təvəkgul - Aşiqiyəm..

Ədəbiyyat 10:28 / 25.02.2026 Baxış sayı: 517

Gözümü yolda qoyan zalım ürək aşiqiyəm,

Dəli sevdama könül etməsə şəkk aşiqiyəm..

 

Necə hicranə düşüb yandısa eşqində canım,

Dərk eylədim bu qəmin axıradək aşiqiyəm..

 

Demişəm ki, sevəcəm məhşərəcən, öz yarımın

Peşman eyləməsə çərxi-fələk, aşiqiyəm..

 

Hərə bir şey diləmiş, əl açıb öz rəbbindən

Mən dedim vəslə çatım, gör nə dilək aşiqiyəm..

 

Yadigar gəldi ki söz məclisinə əhsən ala

Mən nə alqış dilədim, mən nə çiçək aşiqiyəm...