"Növbəti addımımız ölkəmizin sərhədlərini nəzarətə götürməyimiz olmalıdır"

MÜSAHİBƏ 13:31 / 26.03.2023 Baxış sayı: 1699

 

BAXCP sədri, millət vəkili Qüdrət Həsənquliyev Moderator.az -ın suallarını cavablandırıb.

Yenises.az  həmin  müsahibəni təqdim edir:

- Qüdrət bəy, Azərbaycan Silahlı qüvvələrinin Ermənistandan Xankəndinə silah-sursat daşınan yollardan birini nəzarətə götürməsinə münasibətinizi bilmək istərdik.

- Ermənistanın siyasi ekspertləri İlham Əliyevin Qarabağda salami stratejiyasi, yaxud "salami slicing tactiks" həyata keçirməkdə "ittiham" edirlər. Salami hisə verilmiş kolbasa növüdür ki, onu nazik doğrayaraq yeyirlər. Onlar hesab edirlər ki, biz addım-addım öz məqsədlərimizə yaxınlaşırıq. Erməni ictimaiyyətini məğlubiyyətlə barışdırıb Azərbaycanın ərazi bütövlüyünü tanımağa məcbur edirik. Onların dediklərində həqiqət var. Növbəti addımımız ölkəmizin sərhədlərini nəzarətə götürməyimiz olmalıdır və olacaq da. Heydər Əliyev ili Qarabağ üzərində dövlət suverenliyinin bərpası və dövlət sərhədlərimizin bərpası ili kimi də tarixə düşməlidir. Allah köməyimiz olsun ki, böyük qanlar tökülmədən məqsədlərimizə çataq. Azərbaycan əsgərinə eşq olsun!

- Azərbaycana münasibətdə ermənipərəst Qərb ölkələrinin, İranın, Rusiyanın hansısa təxribatları ola bilərmi, yaxud Qərb ölkələrinin sanksiyalar tətbiq etməsi mümkündürmü?

- Biz absurdlar dövründə yaşayırıq. Bu gün dövlətlərin beynəlxalq münasibətlərdəki davranışında qeyri məntiqi, qeyri sağlam yanaşmaları görürük. Abır - həya qalmayıb. Üzdə dostluqdan, qonşuluqdan, strateji tərəfdaşlıqdan, müttəfiqlikdən danışıb arxada riyakarlıq edir, ərazi bütövlüyümüzə qarşı çıxırlar. Bəzi böyük dövlətlərin başçıları, rəsmiləri beynəlxalq hüquqdan, BMT Nizamnaməsindən danışır, amma utanmadan dediklərinin əksini edir, beynəlxalq birlik və kiçik xalqlar qarşısında məsuliyyətlərini unudur, nəyi "maraqlarına" uyğun hesab edirlərsə o istiqamətdə də qərarlar qəbul edirlər. Buna görə də qeyd etdiyiniz təxribatların olması ehtimalını istisna etmək olmaz. Biz belə təxribatların qarşısını heç nədən və heç kimdən çəkinmədən qətiyyətlə alacağımızı nümayiş etdirməliyik. Biz dövlət olaraq BMT Nizamnaməsində nəzərdə tutulmuş hüquqlarımızın, ərazi bütövlüyümüzün bərpa olunmasını istəyirik. Ordu quruculuğuna xüsusi diqqət yetirilməli, ən müasir silahlarla təmin edilmiş, ən çətin vəzifələri layiqincə yerinə yetirməyə hazır olan peşəkar ordumuz olmalıdır.