Mən elə sanmışdım, əzizdir xətrim,

Yaxının saydığın adamam sənə.

Ürək qızdırarsan, ürəyim qızar

Bir taxt qurub tac qoyarıq güvənə.

Mən elə sanmışdım, göy üzü boyda

Sığınacaq yerim, gen çətirimsən.

Ruh ilə, hiss ilə eyniyik elə

Sən də mən havalı, mənim birimsən.

Mən elə sanmışdım, haqqım, divanım,

Üzümü tutmağa Kəbəm olarsan.

Düzləyib ömrümün cadarlarını

Dupduru su kimi axıb dolarsan.

Mən elə sanmışdım, mayaksan daha

Qoymazsan qərq olub sularda azım,

Sayəndə xoş görüb gördüklərimi

Həyatı bir şirin yuxuya yozum.

Mən elə sanmışdım, ağrılarıma

Bir dünya əlacsan, bir aləm çara.

Azalmaq yerinə daha da gəldi

Üstünə sən adlı bir açıq yara.