Xanım İsmayılqızı- Hər gün bu gün deyil ki,

Ədəbiyyat 18:00 / 06.02.2026 Baxış sayı: 232

Hər gün bu gün deyil ki,

Hər gün dünən də olur.

Hər gün gördüyün işıq,

Yanıb sönən də olur.

Hər adam bir bölümdə

Hər an keçir zülümdən.

Hər cəlladın əlindən

Çıxıb dönən də olur.

Hər gücün bir sonu var,

Hər dərdin bir donu var,

Hər kəsin tək canı var,

Susub dinən də olur.

Hər səhər açılmır ki,

Hər yoldan qaçılmır ki,

Hər adam uçulmur ki,

Durub enən də olur.

Hər ağrı dilə düşməz,

Hər fikir ələ düşməz,

Hər yanan külə düşməz,

Baxıb ölən də olur.