Adilə Nəzər- Bu qaranlıq gecədə
***
Bu qaranlıq gecədə
İşıq yolum olarsan?
Yuxundan keçib gəlsəm
Məni evə alarsan?
Bax, donub yenə qarı-
Sənə gələn küçənin.
Bircə cümlə yaz barı,
Qır bu uzun gecəni.
Uzun-uzadı yazma,
Bir söz könlümü açar.
Barmağının istisi
Şüşədən qəlbə keçər.
Keçirdim boşa ömrü,
Keçirdim aram-aram.
Adımı pıçıldasan,
Varlığımı anlaram.
Külək əsir, gün dönür -
Yadıma sən düşürsən.
Məni oda yandırıb,
Sən kimə üşüyürsən?!
05.02.2026