Ramiz Qusarçaylı - Torpağı öldürməyin

Ədəbiyyat 11:35 / 14.09.2026 Baxış sayı: 670

 

“Aqrar şeirlər” silsiləsindən

 

Aqrarı ağlar qoyub

Torpağı öldürməyin.

Bir təpəni qaldırıb

Yüz dağı öldürməyin.

Payız əkin əkini,

Çəkin bağın yükünü,

Qurutmayın kökünü

Yarpağı öldürməyin.

Satıb yerin xamını

Dəyişməyin tamını,

Çürütməyin tumunu,

Saplağı öldürməyin.

Fermeri küsdürməyin,

Bağbanı bezdirməyin,

Kəndçini azdırmayın

Marağı öldürməyin.

Üyütməyin daşlığı,

Böyütməyin boşluğu,

Başda yazın başlığı:

"Torpağı öldürməyin!"