Musa  Xanbabazadə , AYB-nin  üzvü, filoloq - ədəbiyyatşünas :- “Yaddaşa  qayıdış”ın  harayları

Ədəbiyyat 15:24 / 14.07.2025 Baxış sayı: 1525

 

(Yazıçı-publisist  Yaşar  Rzayevin  “Yaddaşa  qayıdış” (Bakı,2021) kitabından  alınan  təəssüratlar  əsasında)

 

Yaddaş-milli  kimliyim,

özümə  hakimliyim,

həm dostum, həm həbibim,

həm loğmanım, təbibim.

Yaddaş  arxeoloqum,

yaddaş  qeoloqum,

yaddaş  güvənc, saxlancım,

yaddaş  bağlı  sandıqçam,

həm bağçam, həm də taxçam.

Yaddaş  bağlı   xəzinəm.

Bayatılı, ağılı,

lətifəli, nağıllı,

laylalı  dolu  sinəm.

Yaddaş-imarətlərim.

Yaddaş-qiyamətlərim.

Yaddaş-qəhrəmanlarım,

şahlarım, sultanlarım.

Yaddaş-çimərliklərim,

mavi  düşərgələrim.

Yaddaş-teatr  binaları.

Yaddaş –el  çayxanaları,

el  aşxanaları.

Yaddaş-kitabxanalar.

Yaddaş-xəstəxanalar.

Yaddaş  ana  dilidir,

elin vuran  əlidir.

Yaddaş  şəhid  məzarları –

elin  solmaz  baharları.

Yaddaş-elm, sənət  soraqlısı.

Yaddaş-bir  yurd  yaraqlısı.

Yaddaş-elin  çıraqlısı.

Yaddaş-dünənim, bugünüm,

həm də  sabahkı  günüm.

Yaddaş-matəmim, yasım.

Yaddaş-Kürüm, Arazım.

Yaddaş-simfoniyalarım.

Yaddaş muğamatlarım –

yelqanadlı  atlarım.

Yaddaş  havacatlarım.

Yaddaş nəsr  əsərlərim –

qılınctək  kəsərlərim.

Yaddaş – savaş  şeirlərim,

şəhidlərim, gizirlərim

və həm də  ki, qazilərim.

Yaddaş – ataya  hörmət,

od-ocağa  sədaqət.

Yaddaş  separatçılardır.

Özgə  kövşənlərdə   bəslənən

boz  atlardır, boz  atlar.

Yaddaş  xalq  fəalları,

xalq  cəbhəçiləridir –

xalqa  sadiq  övladlardır,

övladlar.

Yaddaş  ümummilli  liderlə

xalqın  birgəliyidir,

yurdun  və el-obanın

sağlam  diriliyidir

Yaddaş  ədəbi  mühit,

ədəbi  məclislərdir,

şeir-sənət  gecələri,

yaz  ətirli  şərqilərin

məmləkətdə

dalğa-dalğa  axmasıdır,

qəhqəhlərin, gülüşlərin

ildırımtək  çaxmasıdır.

Yaddaş  mədrəsələr, məscidlərdir,

dini  mərasimlər, ocaqlardır.

Yaddaş  qəbiristanlıqlardır –

o əbədi  aramgahlar.

Orda  yatır həm bədxahlar

və həm də  ki, xeyirxahlar.

Yaddaş-elm-təhsil  ocaqları –

mənəviyyat  dayaqları.

Yaddaş  sürət  qatarı,

sərnişinləri

dünən, bu gün, sabahlardır,

bədbəxtliklər –xoşbəxtliklərdir,

qəlbi  küskünçiliklərdir,

böyüklər  və  kiçiklərdir.

Yaddaş  güzgü-aynadır.

El onsuz  viranadır,

elə  heyvanxanadır.

Qorumalıdır  yaddaşı

yurdun  hər  vətəndaşı.

Yaddaşsız  bir  məmləkət

kölədir, quldur,

ayaqlarda  bir  çuldur.

Varlı  olsa  da  belə,

o, yoxsul, dilənçidir,

alverçidir, çərçidir.

Yaddaş  yoxsa,

əgər  yaddaş  ölübsə,

yaxud  öldürülübsə,

demək, xalq  da  öldürülüb,

demək, millət  yoxaldılıb,

biganəlik  çoxaldılıb.

Ey yurd, sən ey  məmləkət!

Qoruyun  yaddaşları.

Qoy  bizləri  yeməsin

nə yadların  daşları,

nə də  yurdun  başları.

Qoruyun  yaddaşları

Vətən-millət  naminə.

Bu yurdu-məmləkəti

siz  verməyin  zaminə,

siz  verməyin  zaminə!