Tapdıq ƏLİBƏYLİ - SƏHƏR OVQATI

Ədəbiyyat 09:42 / 15.07.2026 Baxış sayı: 365

 

Ağaran dan yeri səhərin rəngi,

Xaliqin xilqətə gözaydınlığı.

Dünya başdan-başa ilahi sərgi,

Əridir içində nur qaranlığı...

 

Tökülür üstümə səhər şəfəqi,

Günəş təbəssümün soraqlayır şeh.

Quşların ötməsi doyulmaz şərqi,

Sanki yarpaqları daraqlayır meh...

 

Duyğu qanadında çiçəkləyir söz,

Heyrət ovqatında misra-misrayam.

Tamaşa etməyə istər iki göz,

Dinir gözəlliklər: gör nə əsraram...