Elə kövrəlmişəm ,elə dolmuşam,

Getdiyin yollara nə qədər çıxım?

Bir xısma sevgi at ümidlərimə,

Bulaqtək gözümdən durulum ,axım.

İstəsən , içinə çək nəfıs kimi,

İntizar gözlərim belə dolmasın.

Göy zəmi dalğalı ipək saçımı,

Həsrətin əlləri bir də yolmasın

Sən coşğun dəniz ol,mən də sahilin,

Toxun yanağıma hey sərin-sərin.

Sahildən dənizə bir körpü salaq,

Vüsal yolu olsun sevgililərin.

Gəl , sənə sarılım sarmaşıq kimi,

Hara dönsən elə o yanın olum.

Heç kəs məni səndən aça bilməsin,

Acıyam, sevgindən doyanın olum.

Özündən uzağa ta salma məni,

Qayıt, ya ünvan de, dalınca gəlim.

Gözlərinin dəniz dərinliyində,

Yosuntək əbədi qalım , dincəlim.