Şakir  Xanhüseynli - İNSAN TƏRƏFİN AĞIR GƏLMƏLİ

Ədəbiyyat 14:19 / 19.04.2026 Baxış sayı: 433

 

harda olursan ol--

daşların içində,

əkində, biçində,

evdə, çöldə,

heç insan olmayan yerdə

insan tərəfin ağır gəlməli...

öz sırana, səfinə keç,

bütün tərəfləri adlayıb

öz tərəfinə keç--

iqrar-iman tərəfinə,

vicdan tərəfinə...

deyirəm kimsə

"mən insanam" yazıb

sinəsindən

bir lövhə assa nə dəyişər;

əgər varsa qəlbində kin,

əməlində şər...

ayağını yerə

bərk basarcasına,

hə, insanlıq tərəfin

ağır gəlməli!..