Aybəniz Əliyar - MƏNİ

Ədəbiyyat 21:45 / 09.07.2026 Baxış sayı: 176

 

Allah, elə-belə alma bu canı,

Bir soyuq baxışa tuş eylə məni.

Qara gecələri sevən gözəlin,

Gözündə bir damla yaş eylə məni.

 

Elə ağrı ver ki, bilməsin heç kim,

Əqlimi məhkum et, ruhumu küskün.

Əvvəl göyümü qur; buludlu, çiskin,

Sonra bir havalı quş eylə məni.

 

Gözüm qəm aynası, duman, çən axar,

Gah yerli, gah yersiz şimşəklər çaxar.

Ürəyimi çıxar, qəlbimi çıxar,

Beləcə bir qara daş eylə məni.