Əyyub Türkay : - NİDAMSAN

Ədəbiyyat 10:05 / 14.07.2025 Baxış sayı: 1303

 

Sənsən mənim taleyimdə

Həm olanım, həm olmazım.

Sənsən kövrək notlarımdan

Varağıma düşən yazım.

 

Gəl, gözümün yaşlarında

Damla-damla əriyənim.

Ürəyimə gedən yolda

Qorxa-qorxa yeriyənim.

 

Qoymaram ki, xəzan tuta

Al-qırmızı güllərini.

Fəsillərin payızında

Üşütmərəm əllərini.

 

Küləklərə inad sənin

Tellərinə çəkim daraq.

Nə gözəldir məhəbbətdən

Qaranlığa düşən çıraq.

 

Mən söyləyim, hər kəs bilsin,

Eşq adında bir adamsan.

Həyatıma son qoymağa,

Həm nöqtəmsən, həm nidamsan!