Xatirə Fərəcli - ÜRƏK ŞƏKLİ ÇƏKƏN QIZ

Ədəbiyyat 09:40 / 01.10.2026 Baxış sayı: 534

 

Ürəklərlə oynayıb

ürək şəkli çəkən qız,

çəkdiyin o ürəkdə sevinc,

səadət nə rəng?

Kövrəlməyi göstər görüm,

baş ürəklə,

ürək başla yollaşmasa yaman olur,

darıxmağı göstər görüm.

Yaşantılar rəng-rəng, xal-xal,

ordan nələr ötüb keçdi, orda nə var?

Baş vurub çıxanlar kimlər,

başa çəkilən kim olub?

Neçə arzu, istəklərə əsim-əsim

əsib gedib,

hansı əzab o ürəyi

öz içindən söküb, didib?

Ürəkli qız,

ay dünyası, özü göyçək,

sən qırmızı qələminlə

qanla yaşayan ürəyi

qan rəngində çəkirsən,

çək!

Xatirə Fərəcli