Şakir Xanhüseynli - GÖTÜRMƏK

Ədəbiyyat 12:00 / 02.06.2026 Baxış sayı: 383

 

həyatımızda saatlar,

dəqiqələr çox,

ələyib, seçib

bir anı götürmək.

daşı daş yanında qoyub

yerinə oturanı götürmək...

yerə düşən bir tikəni,

bir əlcəni,

bəzən təzəni deyil,

ən köhnəni götürmək...

hərdən uşağı da dinləmək,

lap əyilib

o uşağın qoyduğunu götürmək.

nə olursa-olsun,

uzağı yox,

yaxını götürmək,

bax,

ancaq

acılara dözə bildiyin qədər döz,

nə minnət götür, nə söz!

***

bir addım atırsan ha,

ikinciyə maraq yox...

deyirəm adamın yarası ola,

o da

şirin-şirin ağrıya,

daha acıdaraq yox...