MEHDİ CA LAL - GETDİM 

Ədəbiyyat 10:22 / 16.07.2026 Baxış sayı: 513

         

 

Ömür də göz qırpımıtək

Bir an imiş; gəlib, getdim.

Ən müqəddəs arzulara

Aman imiş; bilib, getdim.

 

Baxdım uca dağlar qardı,

Çıxdım ki, qarı bahardı…

Sevinc adlı nəyim vardı

Güman imiş,- bölüb, getdim.

 

Yanıb nakam yaşlarına,

Döndüm sinə daşlarına,

Gecikən göz yaşlarına,-

Yalan imiş,- gülüb, getdim.

 

İtirib yar-yoldaşımı,

Tutdum qovğalı başımı.

Mən sonuncu göz yaşımı

Dünyam imiş,- silib, getdim.

 

Sevgiyə bais ürəkmiş,

Ölümü də sevəcəkmiş,

O da bir nazlı mələkmiş,

Laylam imiş,- ölüb getdim.