Ədalət Salman - BOŞ VER, A ŞAİR…
Ədəbiyyat
11:37 / 24.12.2025
Baxış sayı: 513
Başını sal aşağı,
Çalış arı sayağı.
Görsən dayaz, bayağı,
Boş ver, a şair, boş ver.
Uzaq ol quru şərdən,
Enmə durduğun yerdən.
Zümzümə et şeirdən,
Boş ver, a şair, boş ver.
Şax dur, nə sın, nə əyil,
Düz əyrini kəsir, bil!
Qozbel düzələn deyil,
Boş ver, a şair, boş ver.
Pislik etsə də, nadan,
Qalma yaxşılığından.
Yorulacaq daş atan,
Boş ver, a şair, boş ver.
Fərq etməz onu öysən,
Ya da üzünə söysən.
Dağ tək səbrinə söykən,
Boş ver, a şair, boş ver.
