Ələsgər ƏLİOĞLU  - AY PAYIZ, QAPINA GƏLMİŞƏM SƏNİN

Ədəbiyyat 20:27 / 12.02.2026 Baxış sayı: 382

 

Çöl-çəməndən çiçək ummur gözlərim,

Sığallanmır, tumarlanmır sözlərim...

Boynubükük qalıb daha izlərim,

Enişdən- yoxuşdan keçsəm də çətin;

Ay payız, qapına gəlmişəm sənin.

Demə ki, papağı günə vermişəm,

Sözümü saçımda dənlə hörmüşəm...

Ağrıya-acıya sinə gərmişəm,

Belini qırmışam dumanın, çənin;

Ay payız, qapına gəlmişəm sənin.

Məni tənhalığın qoyma əlində,

Boğulub gedərəm həsrət selində...

Gəl dinib-danışaq xəzəl dilində,

İliyinə bıçaq çək dərdin, qəmin;

Ay payız, qapına gəlmişəm sənin.

11.02. 2026