Dünyanı lərzəyə gətirən, acı yaşadan, illərlə insanların qu­rub yaratdığı gözəllikləri bir göz qırpı­mın­da yerlə-yeksan edən, xarabalıqlara meylli olan MÜ­HARİBƏ...

Qorxu ilə uşaqların, göz yaşıyla anaların, bacı­la­­rın ürəyinə qəlpə kimi dolan MÜHARİBƏ...

Cəllada çevrilib nər oğulları yuvasından, oca­ğın­­dan qopar­dıb, canını qəddarcasına alan MÜHA­RİBƏ...

Yaddaşlarda qorxulu kabus kimi qalan MÜHA­RİBƏ...

Onsuz da bir ucu ölümlü dünyada vaxtsız ölüm saçan dəhşət.

Ölümə yol açan dəhşət. 2020-ci ilin payızında Azər­baycanın qapısını çal­dı. Neçə-neçə gənc oğullarımızı əli­mizdən aldı. Neçə evlərə yas gətirdi, qara bağlatdı.

Ağlatdı bu xalqı, yaman ağlatdı.

Neçə taleləri yarımçıq qoydu, neçə anaları bala­sız, neçə balanı atasız qoydu...

44 gündə yer üzünə endi cəhənnəm sanki. Müa­sir silahlarla, raketlərlə, dünya ilk müharibəsini yaşa­dı. 30 illik həsrətə son qoymaq üçün 30 yaşına çat­mamış gənclər ölü­mün pəncəsində şəhadətə yük­səl­di. Torpaqlardan düş­mənin ayaq izini qanla yudu igid­lərimiz. Alınan torpaqlara sevin­dik, verilən can­la­­ra üzüldük, yandıq, alışdıq. Bunun üçünmü deyib­lər: – "sevinclə qəm qoşadı?"

İçində Vətən sevgisi qaynayan oğullar əl-ələ tut­dular. Vətəni qorumağa getdilər. Sinələrini düş­mə­nə sipər etdilər. Sözün əsl mənasında dar günün da­­yağı oldu Azərbaycan xalqı bir-birinə. Dəmir yum­­­ruğa çevrildi millət bir anda.

Vətənin "oğula" ehtiyacı olduğu o məqamda Bey­ləqanda dünyaya göz açmış Elnur balamız da dö­yüşlərə qatıldı. Hər şəhidin ömür yolu bir dastandı. Elnur da ömrünün "tumurcuq" çağında dastana çev­rildi. Elnur tər­biyəsi ilə, mədəniyyəti ilə hamının kön­lündə yer eləmişdi özünə. Bizim çox dəyərli ya­zıçımız, gözəl qələmə sahib Fazil Sənan bacısı oğlu Elnur haqqında bir kitab yazdı bu günlərdə. Tarixin bilinən və bilinməyən üzünü qabarıq şəkildə qələmə alan yazıçı kitabında ədəbiyyatla bərabər, Azərbay­canın bir parçası, dilbər guşəsi olan Qarabağın ta­rixini də işıqlandırmışdı. Millətlər içində ən mənfur, ən şərəfsiz, ən alçaq millət olan erməni (adlarını be­lə böyük həriflə yazmaq istəmirəm) çox təəssüf ki, bi­zimlə qonşu olub. Və bu mənfur qonşular tərə­fin­dən əsrlərlə hücuma məruz qalmışıq, yüzlərlə, minlərlə itki vermişik. Bütün bunları Fazil Sənan "Qələbə üçün do­ğuldun" kitabında çox böyük ustalıqla qə­lə­mə al­mışdır. Bu kitabda Elnur haqqında o qədər gö­zəl söz­lər deyilib ki, mənim bu müqəddəs qəhrə­ma­nımız haq­qında nəsə deməyimə ehtiyac qalmayıb. Mən ya­zı­çıya təşəkkür edirəm. Çox böyük ustalıqla iş­lə­yib bu kitabı. Sözün əsl mənasında "hardan baş­la­yıb, ha­rada qur­taracağına" diqqət edən yazıçımızı təb­rik edirəm. Uğurlar arzulayıram. Şəhidlərimiz haq­qında nəsə yazmaq əli qələm tutan hər bir kəsin bor­cu­dur. Bu borcunu Fazil Sənan layiqincə yerinə ye­tirib.

Yazıçının sözünə qüvvət, dünya yaranandan bu yana bilinən, bilinməyən faciələr yaşayıb insan oğlu. Ən ağır fa­ciəni isə bizim nəsil, bizim əsr yaşadı. Çünki bu döyüşdə müasir silahlar "at oynadırdı". İl­lər­nən istehsal olunan iri çaplı dağıdıcı silahlar (top­lar, pulemyotlar, raketlər) bizim torpaqlarda təcrübə keçirdi sanki. Dinc əhali, böyük şəhərlər o cümlədən Gəncə, Mingəçevir, Bərdə və sair raket zərbələ­rin­dən lərzəyə gəlirdi. Bu qədər vəhşilik törədəcək qə­dər vəhşiləşdi insan oğlu demək ki,...

44 gün 44 il qədər uzun oldu bizim üçün. Sə­fər­bər etdi millətim bütün gücünü. Qanımızla tarix yaz­dıq gələcək nəsillərə. Elnur və Elnur kimi minlərlə gənc oğullarımızın qanı ilə suvarıldı 30 illik həsrətə doymuş torpaqlar. Nə oğul­larımız getdi amma... Hər biri bir evin, bir elin yaraşığı. Hər biri bir evin, bir elin dirəyi. Anasının, bacısının ürəyi. Ailə­sinin, evi­nin gərəyi... Hər biri bir Vətən oğullar...!

Zəfər sadəcə qazanılmır, həm də qorunur. Zəfər qa­zanmaq Elnur kimi qəhrəman övladların öhdəsinə düşdü. Zə­fərimizi qorumaq isə bizim və gələcək nəs­lin Vətən bor­cudur...! Sonunda Dədə Qorqudun bir sö­zünü xatırladım: "Biz varıq, olacağıq, artacağıq". Də­də Qorqudun bu sözü isə mənə bir vaxtlar yaz­dığım bir şeirimi xatırlatdı:

Hər birimiz qala, alınmaz saray,

Vətən deyə-deyə salmışıq haray,

Sınmaz vüqarımız Qoşqar, Himalay.

Qayadan yarandıq, daşdan yarandıq,

Necə kəs yox olduq, başdan yarandıq.

Düşməni qazdığı quyuya gömdük,

Yurdun torpağına, daşına döndük.

Qərib intizarın yaşına döndük,

Kirpikdən süzüldük, qaşdan yarandıq,

Neçə kəs yox olduq, başdan yarandıq.

Əli misri qılınc, atı oynaqlı

Türkün sevgisi saf, hirsi qaynaqlı,

Zirvələr fəth edən iti caynaqlı,

Qartal, şahin adlı quşdan yarandıq,

Neçə kəs yox olduq, başdan yarandıq.

Düşməni yox etdik qanını töküb,

Torpağa can verdik Şəhidlər "əkib",

Gözdən göy üzünə bir cığır çəkib,

Xəyal dünyasından, boşdan yarandıq,

Neçə kəs yox olduq, başdan yarandıq.

Üç tonqal yandırdı dədəmiz Qorqud,

Arpanı, buğdanı əkdik, sovurduq

Azad Vətən qurduq, məmləkət qurduq,

Kotandan yarandıq, xışdan yarandıq

Neçə kəs yox olduq, başdan yarandıq.

Yenə nərə çəkir, aslan ayılır

Dünyaya bu hünər, zəfər yayılır

Bizim ölümüz də diri sayılır,

Günəş şəfəqindən, xoşdan yarandıq

Neçə kəs yox olduq, başdan yarandıq.

Başın sağ olsun Vətən!

Allah Şəhidlərimizə rəhmət eləsin!

30.10.2025,

Şəfəq VİLAYƏTQIZI