Sərraf Şiruyə - QARDAŞ

Ədəbiyyat 08:26 / 18.06.2026 Baxış sayı: 489

Pərdə-pərdə dilə gəlib, yaş töküb,

Saz məni ağladır, mən sazı, qardaş.

Min yol gədiklərdə saldı borana

Bəxtimə yazılan bu yazı, qardaş.

 

Neçə sözüm tellər üstə ad aldı,

Hər dodaqda bala döndü, dad aldı,

Kərəm ağlamadı, Kərəm od aldı

Əsli çəkəmmədi bu nazı, qardaş.

 

Sərraf Şiruyəyəm, tükənib dözüm,

Qəlbim qəm yuvası, qan ağlar gözüm.

"Var olsun məhəbbət" — bu, mənim sözüm

Bir də telli sazın avazı, qardaş.