Belə küsməkmi olar?

Mənsiz məndən küsmüsən...

Harda olsan taparam,

danışarıq,darıxma...

Dolanaram,dönərəm

səhər,axşam başına,

Tellərindən öpərəm,

barışarıq,darıxma...

Sən ki tale payımsan,

kimdi qismətdən qaçan?

Səndən ötrü çırpınır,

yaxşı bilirsən bu can.

Evinizin yanında

sarı çiçəklər açan,

İydələrin ətrinə

qarışarıq,darıxma...

Bircə dəfə “gəl” desən,

dağı-daşı yaxaram,

Misra-misra süzülüb

ürəyinə axaram.

Gözlərinin yaşını

sinəm üstə sıxaram,

Əllərindən tutaram,

sarışarıq,darıxma...

Tellərindən öpərəm,

barışarıq,darıxma...