eşq hara götürür səni?

pis günlər marığa yatıb.

elə bil ki, kimlərsə eşq

yoxluğunda vara yetib...

əlini əlindən ayır

və birləşdir köksün üstə.

oxşa, daraqla saçını

başını öz dizin üstə...

ürəyində gəzdirirsən

səninçün dərd olanı, bax.

işin harda bitəcəyi

nə əkməyə bağlı ancaq...

get orda lap ocaq yandır,

isinməsi çətin ola;

bir qəlb xarabadı o vaxt

sevgisindən yetim qala...

bir qapını açdığında

bağlanmaya əlin-qolun;

hər şeyi bitirdiyin vaxt

görəsən başlayır yolun...

bir səs üzündə sayrışan

təbəssümə sığal çəkə,

bir baxışın odundakı

hərarətdən kədər ürkə...

kim vəfalı, kim vəfasız,

qaldır yerdən bəxt daşını;

min ilin qəm naxışında

kim görür öz naxışını...

ağı qara çərçivəyə

salmaq tale işidimi...

bəzən elə olur, bir səs

ən yaxından eşidilmir...

əl çatan budaqdan əlin

çatmır bir meyvə dərəsən...

oturub yollar yormağı

etdin özünə peşə sən...