Şakir Xanhüseynli - AĞ KÖLGƏLƏR

Ədəbiyyat 09:43 / 01.06.2026 Baxış sayı: 429

 

bir də görürsən üzünə elə bil

kölgə salırlar,

gözünün altı kölgələndi,

sanki hardansa bir qaraltı endi, endi

düşdü üstünə...

al günün altında kölgədə gəzən kimi

hiss edirsən özünü,

düşünürsən bəs bu kölgə

nə...

göydən uçan quşun da

dünyanı bürümüş kölgəsi varmış kimi,

deyirsən bir kəpənəyin kölgəsində

bütün güllər, çiçəklər

bürüşüb sola bilər;

hə, ola bilər...

ağır kölgələr keçir üstümüzdən, ağır,

san ki, bu ağırlıq nə yerə, nə göyə sığır...