" Sözlərdəki sən "dən

Bu yol,

Kəsib, doğrayıb çölləri

hara gedir görəsən?

Haralardan keçəcək?

Uzana-uzana haralarda bitəcək?

Yöndəmindən bəllidir

zaman-zaman neçə süvari dəstə,

karvan keçib bu yoldan.

Bu yol,

axır tənha yolcunun yorğun ayaqlarında.

Daşa dönən tarixin-

minillərin, yüzillərin hayında, harayında.

Yorulana oxşamır yolçunun gedişiylə.

Addım-addım bölünən

yovşan qoxulu çöllər

xəbər verir

neçə qanlı döyüşdən,

qələbəyə aparan əzəmətli yürüşdən,

Zəfərli Qarabağdan-

son tarixi savaşdan.

Bu yol,

oxuya bilsən-

qədim türk ellərinin fikri, düşüncəsidir.

Ləpir-ləpir yazılan,

at dırnağıyla cızılan

əski xəritəsidir.