1

***

başına döy,

ayağına döy,

üzünə, gözünə döy,

qarnına döy,

dizinə döy,

döy, döy

bu o döy,

o bu döy,

döy, döy.

od od döy,

su su döy

yer yer,

göy göy döy

döy, döy.

haran gəldi vur,

haran gəldi döy

yurdun yad torpağıdı,

ocağın bir ovuc küldü döy

bir dəfə ürəyin açıldı,

bir yol üzün güldü? döy,

döy başına, dizinə,

sağını qoy solunu döy,

döyülənləri bir də, bir də

yenə, yenə döy,

dönə-dönə döy

sinə döy

bu dərd sənə görə döy,

bu qəm sənə görə döy,

döy, döy...

2

GÖZƏGÖRÜNMƏZ

Görünməz olanı görmək--

hə, görmək görünməzi də.

Görmək göyə qalxan ahı

və yerə düşən sözü də...

Nə var, axı, görünməzdə,

onda görünən nəsə var...

Gəl, gözünə görünəndə

indi görünməzlik axtar...

Ey gözə görünməz kişi,

kimsənsə bir gözə görün,

Hər çətinliyə dözmək, bil,

asan deyil, gözə görün.

Sirr görünməz olandımı,

təpə durur dağa qarşı;

Bəlkə elə şeylər var ki,

gözə görünməsə yaxşı...

Ancaq gözə görünməyən

gözə ən çox görünənmiş...

...Bağla yolları belinə

qurşaq kimi, baba dərviş,

Dünya

dünya əzabına

elə sinə gərəninmiş!..

3

VİCDAN ƏZABI

Vicdan əzabından xalisənsə, heç,

Kimliyin ortaya çıxacaq tez-gec...

Uca bir duyğudu insanda, dərin,

səslənən nəğmədi bir sarı simdə;

Onun gecəsindən işıq saçılar,

bax, vicdan əzabı vardırsa kimdə...

Qəlbində həyacan, qanında oddu,

vicdan əzabından uzaq sən nəsən?

Vicdanda bir azca güzəşt etdinsə,

o, acı rüzgartək üstünə əsər;

O, yəni vicdanın- vicdan əzabın

həmişə önünü kəsər bir işdə...

Vicdanı daima əldə tutmaqdı

vicdan əzabıyla görülən iş də...

Bəlkə unuduruq adi bir şeyi,

bilmirik soruşaq kimdən hesabı;

Fikrində qoy günəş parlasın elə,

vicdanlıda olur vicdan əzabı!..

4

***

qapım dünyanın qapısı,

burdan çıxıram dünyaya.

pəncərəm

dünyanın görünən yeri,

burdan baxıram dünyaya...