Könlüm açılmayıb, üzüm gülməyib

Mən sənə könlümü açandan bəri.

O eşqin sarayı uçmayıb, gülüm,

Xəyalım keçmişə uçandan bəri.

…Üzünə çıxmışdı sevginin rəngi,

Sükutla deyərdin sözünü sən ki…

Bir ömür boyunca nə biləsən ki,

Bu cana nə gəldi o candan bəri.

Vaxt keçib - varımla yoxum dəyişib,

Elə düşünmə ki, ruhum dəyişib.

And olsun Allaha yuxum dəyişib

Sən mənim yuxumdan qaçandan bəri.

Adiləm, heyim yox coşub-daşmağa,

Razıyam - mənimlə gəl "dalaşmağa".

Səni gözləyirəm vidalaşmağa,

Gözlərim yol çəkir haçandan bəri.