Göy üzü qaynayır, qarışmaqda şər,

Bağçada dolaşır bir yad hənirti.

İldırım adını çəkməyin, düşər,-

Arada buludlar gümüldənirdi.

***

Səbəb var idimi qoymağa xına,

Olmur hər olanı ən üzdə tutmaq.

Tutdum əllərimi suyun altına,

Yaman çətin imiş suç üstə tutmaq.

***

Sağda sarı armud, solda ağ alma,

Susayıb qonmuşdu susmuş quş arxa.

Çatmadı ünvana alyanaq alma,

Yel vurub salmışdı qurumuş arxa.

***

Məhbəs ömrümüzün tən ortasından,

Keçdi Saatlının bir saatsızı.

Çıxdıq dost toyundan, düşmən yasından,

Sıxdıq köksümüzdə qəlbi çatsızı?

***

Gözümüz yoldadır ağrı dada, dost,

Bir də qulağımız susan səsdədir.

Ruhun uçuşuna çox varsa da, dost,

Cismimiz ömürlük "turbules"dədir.

***

İndi necə edək tərəf tutmağı,

Bilmək üçün bir iş yapmır millimiz.

Nə zamandır tərgidibdir udmağı,

Uduzmağa ölkə tapmır millimiz...