1.

***

göz yaşını silmək

dərhal ağlayandan sonranın işi deyil,

üstündən çox vaxt keçə də bilər;

bir də əlini gözünə aparanacan

dəqiqələr, saatlar bir əsr, qərinə qədər

uzanar da hələ...

bilməlisən ki,

göz yaşını silmək ağlamaqdan betərdi;

kimsə sənin ağladığını görsün də,

amma göz yaşlarını sildiyini görməsin...

2.

***

adam bəzən

elə bükülür, bürünür bir fikrinə ki,

özünü atmış kimi ən dərinə ki...

ancaq bu bükülmə, bürünmədə

ruh başlayır üşüməyə,

yer qalmır bir şey düşünməyə...

ruhun üşüməyi necə olur?

dövrəni bürüyür od-alov,

deyirsən bu həyat lodu, lo;

yaşamırsan bir xoş gün ki,

ağa əl atırsan, qara çıxır

bəxtinə sanki...