Oğurlanan həyatımız var bizim;

an-an, gün-gün oğurlanıb, biləsən.

Ömrümüzdə böyük-böyük yalanlar

doğru olub, doğrulanıb, biləsən...

Oğurlanır bir tikədən yüz tikə,

bir damcıdan ümmanlar oğurlanır...

Kilidlənib ümidlərin qapısı,

birin üstə milyonlar oğurlanır...

Cansız-ruhsuz dolaşırıq sanasan;

canımızdan, vallah, can oğurlanıb.

Düzdən düzlük, yaxşıdan da yaxşılıq,

çəkilmir ki, bir əncam, oğurlanıb...

Nə yapdıq ki, nə yoğuraq, ay aman,

ayaq yoldan, əl işdən oğurlayır.

Oğurluğun mayasında olan nə;

üz həyadan, göz yaşdan oğurlayır...