Qismət oldu yenidən

Dönə bildim kəndimə.

Həyəcandan əsirəm,

Bəs neyləyim indi mən?

Təpələr gəl-gəl deyir,

Yamaclar gəl-gəl deyir.

Beş-on dəqiqə olar

Mənim bura gəldiyim.

Duruşuyla təsəlli

Versə də Səngər dağı,

Heç nə sağalda bilmir

Ürəyimdəki dağı.

Məğrur Qızlqayanı

Baxışımla öpürəm...

Gözlərimin yaşını

Çəmənlərə səpirəm.

Dağ şahidlik etsə də,

Bu ilk vüsal anına,

Kimdi məni buraxan

Evimizin yanına?

Ötən bəxtəvər günlər

Bir-bir düşür yadıma.

Niyə yanıb kül olmur,

Kol-kos mənim oduma?

Tapdamaqdan qorxuraım

Günahsız böcəkləri.

Xatirələr oyadır

Zərif dağ çiçəkləri.

Viranə ürəyimdə

Arzular yuva qurur...

Kəpənəklər uçuşur

Bülbüllər cəh-cəh vurur.

Can dərmanı olsa da

Havası, alışıram.

Bircə qurtum suyuyla

Kükrəyirəm, daşıram.

Burda hər dağ, hər dərə

Mənə doğma, tanışdı.

Seyr elədim dörd yanı

Xatirələr danışdı.

Görəndə ona baxan

Həsrət dolu gözləri,

Elə bil yamacların

Çiçəklləri közərir.

Yer altından səs gəlir

Elə bil Həcətgədə:

-Minalanmış yerlərdə

Nə gəzir höcət gədə?

Qorxmurmu o, görəsən

Havaya sovrulmaqdan?

Xatirələr sacında

Buğda tək qovrulmaqdan?

Doğma məkan olubdur

Nə üçün yad dərəsi?

Tutqundur Cam bulağı,

Küskündür Bad dərəsi.

Bulud kimi dolmuşam

Gözümdə yaş qaynayır.

Dəli bəbəklərimdə

İldırımlar oynayır.

Tənhalıq ağır dərddi,

Göz yaşım puçur-puçur.

Çağırsam da, qayıtmır

Uşqlıq da gen qaçır...

Yamacda gül-çiçəyin

Yoxdu sayı-hesabı. –

Cənnətdə çəkilərmi

Heç cəhənnəm əzabı?!

13.06.2026. Çardaxlı