Bu dünya Tanrıdan bir hədiyyədir,

Hər insan ömrünə o bir səhnədir,

Onun sirlərini bilmərik nədir,

Qoynuna əliboş bizi alandır,

Elə əliboş da yola salandır.

----------------------------

Kimini güldürər, kimini dağlar,

Kimini varıyla özünə bağlar,

Nə dərdə acıyar, nə də ki ağlar,

Hər bir cəfasıyla bizi yorandır,

Arzuları yarıyolda qoyandır.

-----------‐---------------

Qonağıyıq ondan giley etməyək,

Hər oynuna aldanıb da getməyək,

Deyə-gülə xoş yaşayıb söyləyək,

Başdan-başa sınaqdır, imtahandır,

Öz halına hər an özü yanandır.

---------------------------

Bir üzü sevincdir, bir üzü qəhər,

Bir üzü gecədir, bir üzü səhər,

Onda mərd yaşamaq cəsarət, hünər,

O, necə var, elə o cür olandır,

Çöhrəsi də nə saralıb, solandır.

--------------------------

Bu dünyanın suda sönməz odu çox,

Yaxını çox, doğması çox, yadı çox,

Qəzənfər, zülmü çox, istibdadı çox,

O nə sənə, nə də mənə qalandır,

Bizə qalan bir ömürlük zamandır.