Kəmaləddin Qədim - SABAH GÖRSƏNİR MƏNDƏN...

Ədəbiyyat 10:00 / 07.02.2026 Baxış sayı: 438

 

Mən bir dəli ozanam,

düşməz dilimdən haqlar.

Qurular yan-yörəmdə

nə tələlər, duzaqlar...

Dünya minib çapılar,

Nələr, nələr yapılar...

Dörd yan bağlı qapılar,

açılmayan qucaqlar...

Hələ nə çox yançılar,

Yalanlar, yalançılar.

Ürəklərdə sancılar,

kürəklərdə bıçaqlar...

Nə qədər beləcə bax

bu susanlar susacaq;

haqlılar uduzacaq,

haqsızlar udacaqlar...

Gəl al da məni məndən,

Sabah görsənir məndən...

Allahım, səni məndən

betər unudacaqlar...