Onsuz da çox olur itirdiyimiz,

il düzəldə bilmir günün səhvini.

Yaşamağa tələs – açmağa tələs

bu dolaşıq düşmüş vaxt kələfini.

Yaşamaq həvəsi dincə qoyulmaz,

ümidə, istəyə, gümana tələs.

Var isə zamanı qabaqlayanlar,

arzu qanadında cahana tələs.

Sünbültək dən tutsun ömrün anları,

fikir bağbanları, söz bağbanları

vaxta gözlərindən su içirərlər.

Özünə yağıdı, özünə qənim

vaxtı öldürənlər, vaxt keçirənlər.

Yaşamağa tələs, vaxtında tələs

yaşamaq həvəsi dincə qoyulmaz.

Bunu ki bilirik,

vaxtsız ölümlər

nə qədər geciksə vaxtında olmaz.

Yaşamağa tələs!

Döyün bu həyatın damarlarında

nəbzinlə qoşa!

Sənə bəxt verilən, tale verilən

sənə ömür olan hər anı yaşa!