Ehtiram İlham - SARI

Ədəbiyyat 22:27 / 12.03.2026 Baxış sayı: 147

Sevinc görməmişəm ha, adını eşitmişdim,

Yol alıb yürüyürəm dərdə-zülümə sarı.

Yüz çiçək becərmişdim, tək bircə ləçəyindən

Rahiyəsi çataydı solan gülümə sarı.

 

Bu vücudum ağrıdan əzim-əzim əzildi,

Düzlərimiz düzlənib, düzüm-düzüm düzüldü.

Ya bir göz qırpımıdı, ya,da ki, əlli ildi

Bu pəzəvəng ömürdən göyçək ölümə sarı.

 

Nə oldusa, haqq oldu Ehtiramın səbrinə,

Hələ dözüb durursa bu fələyin cəbrinə.

Yandırıb hər misramı, səpərsiniz qəbrinə,

Sürünsün kəlmə-kəlmə yanan külümə sarı.