Dağ boyda Kişi.- Aydın, Kübar , Dəyanətli, Təmənnasız və bəy oğlu BƏY DOSTUM , GÜVƏNCİM Cingiz ƏLİOĞLUNUN RUHUNA

Kədəri  qapında gözlət - deyirdin

Qoyma -hakim olsun içində sənə!

Gizlət  göz  yaşını, gizlət  deyirdin -

İndi  kim  deyəcək  bunları  mənə!

Sən  sözün  bətnində, söz də  canında   

Kübarlıq üzürdü vallah qanında!

Kiçik  görünürdü  çoxu  yanında -

Hamının da  əli  çatırdı  sənə!

Yerişin, duruşun, hətta  səsin də

Yoxuydu dünyanın  heç bir  kəsin də!

Allahın  insanlıq  mərtəbəsində -

Tək  idin, yek  idin, səndin  bir  dənə!

Saflığın, paklığın, bir  də  tamlığın

İşində, sözündə  tam  adamlığın ...

Sən idin güvənib  tamamlandığım -

Dostluq  miras  qoyub getdin  sən mənə!