Xatirə Fərəcli - MƏN ŞANSIMIN QATİLİ

Ədəbiyyat 15:10 / 16.01.2026 Baxış sayı: 1437

 

Mən elə fürsətləri

gözardı etmişəm ki,

ayağıma gələni

adlayıb getmişəm ki.

Şans döyəndə qapımı

yuxulu olub ağlım,

elə yuxuda qalıb

bəxt deyilən nağılım.

Söndürdüyüm ocağın

külüdür oynadığım,

öldürmüşəm çarəni

ölüdür oynadığım.

Bu bəxtin, belə suçun

nə andı, nə əmini?!

Mən şansımın qatili,

imkanımın qənimi.