Uzaqlara gedən qatar - Əlizadə Nuri

Ədəbiyyat 11:23 / 25.05.2026 Baxış sayı: 102

 

Uzaqlara gedən qatar,

Bu yorğun səsimi apar.

Vaqonlarda soyuq olar-

İsti nəfəsimi apar.

Kim qalıb ki, nə istəyəm?

Eşqdən ianə istəyəm.

Ölümə həvəs üstəyəm

Götür həvəsimi apar.

Ağ gün gəzdim qara xalda,

O nə halda, mən nə halda.

Darıxıram bu vağzalda

Mənim qəfəsimi apar.

...Uzaqlara gedən qatar,

Salam söylə uzaqlara.

Halımı soran tapılsa,

Söyləmə ki,"yaxşı deyil"

Yalan söylə uzaqlara...