Nola , dönüb uşaq olam bircə gün,

O çağlarım bir də dönə, gələ, offf..

Dizin-dizin iməkləyəm,yıxılam,

Anam yenə göz yaşımı silə, offf...

Quzuları sübh-obaşdan haylayam,

Kərəntiylə çəmən boyu laylayam.

Ulaqları alıqlayam, taylayam,

Üst-başımdan yovşan ətri gələ, offf...

Harda qaldı o insafsız, çağlaya,

Yenə gəlib gözlərimi bağlaya.

Hörüyünə əl vuranda ağlaya,

Sonra qaçıb gülümsünə, gülə, offf...

Mən gecikdim,o, yamanca tələsdi,

Köçüb getdi , ürəyimdə tel əsdi.

İstəyimə belə qara yel əsdi,

Urcah oldum bir zəhrimar dilə , offf...

Çox öyündüm qəlbimdəki dözümnən,

Ağ bayraqtək yaş ələndi gözümdən.

Böyüdükcə aralandım özümdən

Axır düşdüm bu dəlisov selə, offf...

Bu həyatdı--hər addımı yarışdı,

Arzularım taleyimlə barışdı.

Yaşamağa başım elə qarışdı,

Ömrü-günü yaman verdim yelə, offf...İ