İllər sonra qəfil çıxdın qarşıma,

Nə ağrılar yaşadım mən o anda.

Bu günümdən dünənimə boylandım

Boynubükük dayanmışdın qarşımda.

Bir zamanlar sevgi dolu gözündə

Bu günümün səadətin görmədim.

Etinasız baxışlarım üzündə

Mən sadəcə əllərimi yellədim.

Üz çevirib səndən getdim harasa,

Xoşbəxtliyin harayını duymadan.

Mən səadət axtardıqca hardasa,

Səadətim boylanırmış arxadan.

Biz heç nəyi görmürük ki, vaxtında

Ömrümüzə min xəyanət edirik.

Gözümüzün önündəykən çox zaman

Səadətdən üz çevirib gedirik.