... İki bayraq doğuldu

Bir istəkdən, amaldan,

Haqqın qüdrəti oldu,

Onu göyə ucaldan;

Yaxasında ay, ulduz,..

Elə bil göy üzüdü;

Yelləndikcə, göz udan

İlğımlar dənizidi;

... Elə ki, boy göstərər

Bakıdan, Ankaradan,

Onların varlığına

Şükr eyləyər yaradan;

Türk adı – Tanrı adı –

Göylər kimi müqəddəs;

Ucaldımı, bir daha

Göylərdən yerə enməz;

... İki cocuq oxuyur:

Əcdadının dilində,

Iki bayraq yellənir,

Cocuqların əlində;

Bu yellənən bayraqlar

Öpüşəndə, nə mutlu!

Bu bayraqlar yan-yana

Dayananda umutlu!

Onlar Türkün bayrağı,

İkisinin bir canı!

Bir bayraq Türkiyənin,

Biri Azərbaycanın!

05.05.2014