Sevinc Qərib - TANRIM

Ədəbiyyat 10:42 / 12.08.2026 Baxış sayı: 249

 

Tanrım,

sınaqların bitdisə,

dərindən nəfəs alım.

verdiyin vaxt yetdisə,

yardan halallıq alım.

Tanrım,

bir az nurundan ələ,

ömrüm aydına çıxsın.

ağır gəlir bu şələ,

qıyma dərd məni yıxsın.

Tanrım,

Saflığımın bədəlin

belə ödətmə mənə.

bu yarımcan bədənin

ruhu tam gəlsin sənə.

Tanrım,

dua yazdım kağıza

şeir qoydum adını.

salma dilə-ağıza

sözə aşiq qadını...

Tanrım,

nə alırsan, al məndən,

söz sevdam lütfün olsun.

bircə "gəl!"inə bəndəm,

ölsəm sözüm sağ qalsın...