Qəribə bir gün idi, o gün

o payız günü..

Saralan zəmilərin üstündəki sərçələr

toy-bayram içindəydi..

Çöllərin sükutunu pozurdu kərəntilər,

atamgil biçindəydi..

Əslində o çölləri oyadan biçinçilər

Fatihə oxuyurdu yayın cənazəsinə..

Solub getmiş çiçəklər

Çoxdan yadırğamışdı arıların səsinə..

Açılırdı astaca payız köhnə qapıtək..

gözətçi Əli kişi

düşmüşdü üzüquylu

ömrü yollarda bitmiş cırıq ayaqqabıtək.

Məqribdən-Məşriqəcən

dəli göy gurultusu

sayıqlayıb keçirdi.

Bütün xatirələri sovururdu küləklər,

Küçələr yarpaqları ayaqlayıb keçirdi.

Göylərin sinəsini şırımlayıb vəl kimi

Xiffətini çəkirdi durnalar uzaqların.

Eşidirdim arabir futbol həyəcanını,

bığ yeri təzə-təzə tərləyən uşaqların.

Kəndin baş tərəfindən gülümsünüb enirdi

Günəş qürub çağına.

Qapılar asta-asta örtülürdü payızın

yalançı sazağına..

Bir də bir it hürürdü hardasa lap uzaqda..

Lap elə adam kimi, acı taleyə-baxta..

Qəribə bir gün idi o gün,