Süleyman Abdulla : - ÜRƏYİMİN İSTİRAHƏT GÜNÜ

Ədəbiyyat 08:45 / 16.02.2025 Baxış sayı: 1097

 

İstirahət günüdür sənsizliyin,

Adamın ağlı işləmir fikirdən.

Yandirsəyi vurub qayğılar

beynimin tən ortasında...

Kədər belədən belə şellənir vücudumda,

nisgil elədən elə...

Sıxıntılar kölgələnir sinəmdəki səhrada.

Ürəyimdə dincəlir ağrılar,

Gözlərimdə üzür qəm

Uyumaq istəyir kirpiklərin yol həsrəti...

Bütün yoxluqlara rəğmən

yatmaq istəyirəm sinəmə sıxıb ürəyimi...

Bir gün dincəlmək haqqı var hər kəsin,

Canı çıxsın yorğunluğun...

Bu gün istirahət günüdür,

Ərkim də çatmır ürəyimə ki, deyim yat...