Salam ,təzə Horovlum

Bu bayramın mübarək,

Ayrılığı , həsrəri

Aradan silək gərək.

Salam, yoxuşum, dağım,

Salam bostanım , bağım.

Mənsiz quruyan iydəm,

Kökü saralan tağım!

Salam,”Orta kəhriz” im

Qosqoca Xan cinarım!

Salam , Ziyarət dağım,

Güvənc yerim,vüqarım!

Xoş gördük “Xəlfə bulaq”

Salam, “Daşlı güney” im,

Bilmirəm, umu-küsü,

Kimədir bu gileyim?

Tanıyan varmı kiməm,

Ölüyəm ya diriyəm?

Qürbət küləyi döyən

Günahkarın biriyəm!

Xatırlayan olarmi

Bir vaxt şirin avazlı,

Saçı çiçək qotazlı,

Yaşıl bahar həvəsli

Şərqilər deyən qızı?

Anası “Bahar qızı”

Adı vermişdi ona,

Bənövşəni tikərdi ,

Örpəyinə , donuna.

Doğma məktəbin zəngi

Görən yenə vururmu?

Anam göy göyərçıntək

Əlində şor dürməyi,

Başında köhnə şall ,

Yol üstündə dururmu?

könlümdən gəlib keçdi

Yenə nələr, gör nələr,

Uşaqlığım kövrəldi

Baş aldı xatirələr.

Bir yerə toplaşın

Yenə həmyaşıd qızlar,

Cərgələnib ,şax durun

Şəhid-şəhid oğlanlar.

Məhlə-məhlə bölünüb

Yenə duraq üz-üzə,

Qayıdın , siz ömrümə

Ehtiyacım var sizə.

Sənə gələ bilmirəm

Səhhətimə nə deyim,

Yaxın gəl, gucaqlaşaq

Son borcumu ödəyim!

Salam , təzə Horovlum

Bu bayramın mübarək,

Ayrılığı , həsrəti

Aradan silək gərək!