Yuva

budaqda bir quşun,

sənin qurduğun xəyalmı...

Heyif, payını çalanlar

bir dəfə qapını çalmır...

Yumub gözünü hər şeyə

fikrindəki bir işi gör...

Arxanca su əvəzinə

kimdi atan o daşı, gör...

Kürəyinə yüklənən yük

yolun sonuna varmaqmı...

Ümidsizliyə qapılmaq

elə naümid olmaqmı...

Hesab sora da bilmirsən

üstünə gəlin, ya çıxın;

Kimə deyəsən bu, ağdı,

bu da ki, qara, bir baxın...

Bir anlıq əl bulaşdırıb

hansı düyünü açasan...

Axı, bir çətin sualın

cavabı da deyil asan...

Bir qarışqa yolu tutub

ruzi haqda düşündünmü...

Heç ömründə çörəyinin

duzu haqda düşündünmü...

Kömür ilə əlləşən də

saçlarına ağ düşürür.

Ömür bir ağac misalı,

elə hey yarpaq düşürür...

Ötənlərdən miras təki

gəlib bizə çatan dərd var.

Sayı yüzü, mini aşan

sanki elə bir namərd var...

Xeyir şəri izləsə də,

ayaq basmaz izi üstə.

Gözlə, dua eləyərkən

düşüb qalma dizin üstə...