And içirəm

özünü adamın üstünə salan

azad göyərçinlərin,

sahibsiz pişiklərin,

küçə itlərinin

aclıqdan təntiyib

yoxa çıxan qorxusuna,

And içirəm

ramazan lütfünə sığınan

kasıbın mətbəxindən gələn

şorba qoxusuna,

And içirəm

bomba səsinə alışan

müsəlman cocuqlarının

məsum yuxusuna...

And içirəm ki,

bu yazağzı

yerə baxıb, göyə baxıb,

dirçəlmək istəyəcək adamlar yenə.

Söz verirəm

dərsini bilməyən uşaq kimi

başını aşağı salan bayraqlara,

Söz verirəm

hər gecə yuxuma girib

xilqətin üzünə tüpürən ruhsal qınaqlara,

Söz verirəm

o dünyaya hazırlaşan

üzüqara qonaqlara,

Söz verirəm

“siz bizim işıqlı gələcəyimizsiniz”-

dediyimiz uşaqlara...

Söz verirəm ki,

yenə uğurla aldanıb,

yaşam xətrinə

hünərlə aldadacağıq

səsimizə yetənləri ,

ta göydən üç alma düşənə qədər...

04.03.26