Yersiz külək şəhərin saçlarını qarışdırıranda,

küçə fənərləri səninlə məni barışdıranda,

sənli yuxular məni danışdıranda,

iş-güc məni sənsizliyə alışdıranda

yenə yadıma düşürsən, yenidən sevirəm səni…

Deyirlər ki, tarix tez unudur sevməyənləri.

Həmişə gecələr

qorxulu olur xatirəli gölgələr

Gör yadıma düşərmi, özgələr?

Yenə səni xatırlayıram,

özüm də yorulmuşam,

Görəsən, sənin nəyinə vurulmuşam?

Gör, necənçi dəfə sevirəm səni.

Eşitmişəm ki, mələklər qorumur gəlməyənləri…

Sənin indi nə etdiyini niyə soruşum ki,

bilirəm də…

Külək kədərimlə gizlənpaç oynamasa

çəkə bilmərəm sənsizliyi

ölürəm də…

Bəlkə yüzüncü dəfə, bu adamı sevirəm də…

Fırlanıb, fırlanıb eyni nöqtəyə gəlirəm də.

Gizlətmirəm ki, sevdiyimi

sənə yox, özümə açıq deyirəm də.

Bir kişini yüz dəfə sevmək

hər qadının işi deyil ki!..

O mənim özümdür, biri deyil ki!..

Küləkli gecələrdə zərif meh kimi

yağışlı gündüzlərdə torpaq iyi kimi

fəsillər dəyişdəndə alça çiçəyi kimi

sevmək…

Taleyin ironiyasına təkbaşına gülmək

Ölənə qədər onu sevəcəyini bilmək…

Bu fikirlər adamı yeyib-bitirir

onu külək yox,

deyəsən kağız gəmilər gətirir.

Bəzən adını unuduram

bəzən bütün söylədiklərini

bir qurtum su kimi uduram

Görəsən, səni sevməklə səni yoruram?

Hər dəfə dağıtdığımı yenidən qururam!

Sən qapını döyəsən deyə,

eləcə qapı dalında dururam.

Kimsə səndən xəbər gətirsə

sual vermirəm, susuram.

Bekarçılıqdan sənin riyaziyyatını

özümün ədəbiyyat sevdama vururam.

Xəstələnsəm, yadıma düşmürsən

Sən həmişə toplanırsan,

heç vaxt bölünmürsən

Niyə xəyallarımı tərk etmisən

daha görünmürsən?!

Səni dəfələrlə sevməyimlə öyünmürsən?

Dostların deyir çox ciddiləşibsən

mən gedəndən heç gülmürsən…

Necə olsa öləcəyəm deyə,

səni niyə sevim ki?

O qədər avam deyiləm daha

sənə niyə “sevirəm” deyim ki?

Ağıllı qadınamsa, niyə ayrıldığımız yerə gəlim ki?

Niyə səni orda pərişan görüm ki?

Bir az qocalmışam o vaxtdan bəri

Əllərimin qırışlarında gizlətmişəm səni

Sevməyin ölçüsü, sayı olmur, yəni

Deyirlər ki, fələk də döndərəmməz dönməyəni!

Belə getsə külək aparacaq gözləyəni…

Bəs sən necənci dəfə sevirsən məni?.