İki il əməkdaşlıq etdiyim “Azərbaycan təbiəti” jurnalından gedəndən sonra Azərnəşrdə işə düzəldim. Bədii ədəbiyyat şöbəsində işləyirdim. Bir gün yenə nə üçünsə “Azərbaycan” nəşriyyatına getmişdim, ikinci mərtəbədə Məmməd Araza da dəydim – xəstə şair mənim xeyirxahım idi. Soruşdu, hardasan indi, iş tapdınmı, dedim, Azərnəşrdə, bədii ədəbiyyat şöbəsində işləyirəm. Dedi, həəə? Sən elə mənim dalımca gəlirsən ki..! Şair əvvəllər bu şöbənin müdiri işləyibmiş.

O gün Mətbuat Şurasına getmişdim. Bilirsiz, harada yerləşir? Məmməd Araz küçəsində. Dedim, şair, yenə dalınca gəlirəm... Sənin poeziyan möhtəşəmdir!

p.s. Gənc şair Fərid Hüseyn yazır: Məmməd Araz "...Musabəyov qəsəbəsi Sallaqxana küçəsindəki 30 saylı binada, mənzil 30-da... yaşayıb.

...Maraqlıdır ki, ömrü boyu yaşamağa düz-əməlli bir ev tapmayan Məmməd Arazın adı Bakının “Milyonerlər məhəlləsi” kimi tanınan küçəsinə verilib..."