Ömrümdən yel kimi ötən köhlən -günlərimin üzəngisindən sallaşa-sallaşa yaşayıram.

=

Yana-yana içərisində bişən xörəklərlə yüzlərlə üzləri ağardan qazanların özlərinin üzü qara olub həmişə .

=

İnsanı sevərlər,əşyaları istifadə edərlər.

İnsanları istifadə üçün sevənlər də çoxdur .

=

Sənin üzünə açılan şəhərin yağışlı ,yaxud Günəşli başlamağının elə də fərqinə varma...

Şükr elə ki, sənin yeni günün başlayır...

=

İnsan zirvəyə qalxanda onun ayaqlarının altından qaçan daşların kimlərinsə başına düşmək ehtimalı böyükdür.

=

Biz həyatda hər bir hədiyyədən iki və daha çox ala bilərik...

Ulu Yaradanın bizə hədiyyə etdiyi ömürdən başqa...

=

İndi qızıldan təxti olanlar,elə qızıldan bəxti olanlardır.

=

Ağılsız adamın öz "ağlını" nümayiş etdirdiyi məclisdə iştirak çox üzücüdür.

=

Xəyalımızda anidən qurduğumuz möhtəşəmliyi ,elə anidən də ən zəif səs ,ən kiçicik bir şey uçura bilər.

=

İstidə kef çəkənlərin əksəriyyəti soyuqda,şaxtada əziyyət çəkənlərə borcludurlar.

=

Həyatda kiməsə məsləhət vermək,yaxud kimisə ittiham etmək olduqca asan bir şeydir.

Onu bacarmayan çətin tapılar...

=

Gözəlliyin ,gözəl duyğuların ,gözəl hisslərin yerini hislər ( tüstülər,qurumlar) tutanda fəlakət başlayır.

=

Ürəkdə "yağa düşməmiş"( ürəyin yağına) ağızdan çıxan sözlərin,kəlmələrin dadı-tamı olmaz.

=

Abır-həya olmayan adamda axmaqlığın əsas nişanəsinin olduğunu anlamaq çətin deyildir .

=

"Gözüqıpıq" boyüyən uşaqların azacıq çətinlik görəndə ,bir andaca gözləri "böyüyər"...

=

Ürəyi qurdludursa,qurdun ölçülərinin ,rənginin ,növünün ,sayının heç bir əhəmiyyəti yoxdur...

Qurd elə qurddur...

=

Xəmiri yalanla yoğrulmuş,ilk nəzərdən parlaq işıq kimi görünən saxtakarlıqdan uzaq olaq...

Elə işıqdansa,qatı duman yaxşıdır...

=

Dizlərinizin taqəti,qollarının gücü azalsa da,qəlbinizin saflığı ,ürəyinizin ritmləri və ağlınızın gücü heç zaman azalmasın.

=

Elin gözündən düşməkdənsə,gözlərinin çıxıb düşməsi yaxşıdır.

=

Bu gün "özününküləşdirdiyin " heç bir şey onsuz da nə vaxtsa sənin olmur,unutma!

=

Hər yerdə,hər zaman ,hər kəs ,hər şey üçün bir hədd,ölçü,qədər,norma ,səviyyə var.

Onları aşmağın sonu,nəticəsi arzuolunmazdır.

=

Ağlının gözüylə baxsan səhv etməzsən, daha yaxşı görərsən...

=

Əyri baxsan ,düz görə bilməzsən...

=

Ağılla ürəyin iş birliyi uğurlu olur.

Ürəyini dinləyib,ağılla hərəkət eləsən uğur qazanarsan...

=

Pak insanlar,təmiz vicdanlılar gecələr rahat yata bilmirlər ...

Əsəbləri oyaq olur: haqsızlıq,ədalətsizlik...

=

Yeyənlərin içinə bir yeməyən düşsə ,yeməyə öyrəşməsə,yeməsə...yeyənlər onu da yeyərlər...

=

Əgər su axıb,çüxurunu tapmasa ,mütləq özünü harasa " çırpacaq",yaxud "hardansa atacaq özünü"...

=

İnsan həyatının ağır,çətin bir zamanında ,məqamında ona təsəlli üçün deyilən söz ,kəlmə,cümlə hər şeydən dəyərlidir .

=

Hündürdən yıxılan həm özü əzilər,həm də "kimisə,nəyisə əzər"...

=

Dərdlər boyunduruq kimi keçib boynuma,boğazıma ...daşımağa məhkumam...

=

Özünün kim olduğunu dürüst anlamayan adam ,başqasına düzgün dəyər verə bilməz.

=

Gücümüz çatmayanda arxasınca qarğış yağdırmaqla təsəlli tapırıq...

=

Həqiqətdə cılız olanlar,kimlərinsə nəzərində böyük,ali görünə bilərlər...

=

Əyri insanlar həqiqətin gözünə əyri və sərt baxışlarla baxıb,onu da əyə bilirlər...

=

Vətənə məhəbbət,vətənpərvərlik atadan qalan var-dövlət deyildir ki,irsən keçsin.

Onu aşılayırlar,o hissi yaradırlar ...

=

İnsan ona havayı verilənlərin qədrini-qiymətini çox zaman bilmir,bu da ona baha başa gəlir.

=

Adam var söz,töhmət götürməmək üçün hətta yük də götürər.

=

Yaşadığın günü inamla yaşa,sabaha ümid elə,amma qəlbində sevgi əbədi olsun.

=

Özü-özünə tərbiyə verməyi bacarmayan adam həm çətin tərbiyə olunar,həm də çətin islah olunar.

=

Oxumaq xatirinə oxuyur,danışmaq xatirinə danışırıq...

Yaşamaq xatirinə yaşayırıq...

Bu nə oxumaq,nə danışmaq,nə yaşamaqdır...