Elnur Uğur Abdiyev - Bir  gün...

Ədəbiyyat 09:13 / 16.01.2026 Baxış sayı: 2027

Tumurcuq arzular qopur,

Ta öləcək dilək bir gün.

Quş yuvasın sökdüyündən,

Utanacaq külək bir gün.

 

O gün gec olacaq,bəlkə,

Günü ovutmaz o kölgə,

Düşüb çöl- çöl, bölgə- bölgə,

Əl gəzəcək ələk bir gün.

 

Yerin təkindən- göyədək,

Ahlar göyü göyərdəcək.

Bizə baxıb şükr edəcək,

Şeytan adlı mələk bir gün.

 

Bir kitabda son yazacaq,

Sonda sevgi fon yazacaq.

Yenidən qanun yazacaq,

Daş üstünə lələk bir gün.