Ayaz   Arabaçı - Fırlanır dünya

Ədəbiyyat 18:55 / 06.10.2026 Baxış sayı: 376

Yarpağına, çiçəyinə,

Quşuna, fırlanır dünya.

Baharına, payızına,

Qışına, fırlanır dünya.

 

Çox üzülmə yansa canın,

Nəyi var bir qaşıq qanın,

Bəlkə də bir qarışqanın,

Xoşuna,fırlanır dünya.

 

Od ələyir könlüm ahı,

Kim yuyacaq bu günahı,

Gətir görüm o silahı,

Qurşuna fırlanır dünya.

 

Vəd veririk, söz sovuruq,

Bir ovucuq, bir hovuruq,

Ay güdürük, il qovuruq,

Boşuna fırlanır dünya.

 

Gücün çatır, vermə izn,

Cırmaq-cırmaq, dizin-dizin,

Bütün günü evinizin,

Başına fırlanır dünya.